wrapper

Материалы отфильтрованы по дате: Июн 2021
11.06.2021, ноҳияи Бобоҷон Ғафуров
 

11 июн Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон муҳтарам Шавкат Мирзиёев дар Қасри таърихии Арбоб бо аҳли зиё ва фаъолони вилояти Суғд мулоқот намуданд.

Дар оғози мулоқот Президенти Ҷумҳурии Тоҷикистон муҳтарам Эмомалӣ Раҳмон бо самимияти хос меҳмони олимақом - Президенти Ҷумҳурии Ӯзбекистон муҳтарам Шавкат Мирзиёевро ба Тоҷикистон хайрамақдам гуфта, бо хушнудӣ таъкид доштанд, ки ҳар як вохӯрии ҷонибҳо ва муҳокимаи робитаҳои дуҷониба барои таҳкими шарикии стратегӣ саҳми босазо мегузорад.

 Ҳамкории мутақобилан судманди Тоҷикистону Ӯзбекистон ба умумиятҳои ҳудудӣ, ҷуғрофию таърихӣ ва фарҳангии ду мамлакати ба ҳам дӯсту ҳамсоя асос ёфта, таърихи чандинасра дорад. Рушд ва таҳкими ҳамкории дуҷониба байни Тоҷикистону Ӯзбекистон на танҳо барои ояндаи халқҳои мо, балки барои таъмини сулҳу субот ва амният дар тамоми минтақа низ аҳамияти стратегӣ дорад, - изҳор доштанд, Президенти Ҷумҳурии Тоҷикистон муҳтарам Эмомалӣ Раҳмон.

Ҳамчунин Сарвари давлати Тоҷикистон дар бораи мавқеи ягонаву устувори давлатҳо ва мардумони ду мамлакат барои идомаи рушди муносибатҳои шарикии стратегӣ андешаронӣ карда, таъкид доштанд, ки ҷонибҳо бо истифода аз боварию эътимоди байниҳамдигарӣ барои ноил гардидан ба татбиқи тавофуқоти пешин талош хоҳанд кард.

Таъкид гардид, ки халқҳои мо, новобаста аз мушкилоти зиёд ва рӯйдодҳои таърих, ҳамеша барои ҳифзи анъанаҳои неки дӯстӣ ва бародарӣ талош меварзиданд ва беҳтарини онҳоро то имрӯз нигоҳ доштаанд.

Дар воқеъ, тоҷикон ва ӯзбекҳо ҳамеша ба таҳкими риштаҳои дӯстию бародарӣ кӯшиш мекарданд ва садоқати худро ба ин арзишҳо собит намуданд.

Намунаи возеҳи ин гуфтаҳо муносибатҳои дӯстона ва бародаронаи Мавлоно Абдураҳмони Ҷомӣ ва Мир Алишер Навоӣ мебошанд.

Зимни суханронии худ Президенти Ҷумҳурии Ӯзбекистон муҳтарам Шавкат Мирзиёев аз пазироии гарму самимӣ, дӯстона ва бародаронаи Президенти Ҷумҳурии Тоҷикистон муҳтарам Эмомалӣ Раҳмон ва мардуми тоҷик изҳори хушҳолӣ ва сипосу қадрдонӣ карданд.

Ҷонибҳо бо қаноатмандӣ изҳор доштанд, ки кушодани ҳамаи гузаргоҳҳои сарҳадӣ ва барқарор намудани ҳаракати мунтазами нақлиёти автомобилӣ, роҳи оҳану ҳавоӣ байни давлатҳои ҳамсоя ба манфиати соҳибкорон ва мардумони ҳар ду мамлакат буда, ҷиҳати густариши муносибатҳои иқтисодию тиҷоратӣ шароити мусоид фароҳам овард. 

Густариши равобити фарҳангию гуманитарӣ ва мунтазам баргузор намудани чорабиниҳои фарҳангию ҳамоишҳои илмӣ бо иштироки адибону олимон ва арбобони фарҳангу санъати ду мамлакат аз мавзӯъҳои дигар ва муҳими мулоқот бо аҳли зиё ва фаъолони вилояти Суғд ба ҳисоб мерафат.

Пас аз суханронии сарони давлатҳо профессори Донишгоҳи давлатии Хуҷанд ба номи академик Бобоҷон Ғафуров Матлубаи Мирзоюнус ва сокини ноҳияи Деваштич Наврӯза Мамирова баромад карда, барои фароҳам овардани шароиту имконот дар самти рафтуомади озодонаи шаҳрвандони ҳар ду мамлакат, рушди саёҳату тиҷорат ва дигар тадбирҳои зарурӣ, ки боиси баҳамоии халқҳои тоҷику ӯзбек гардид, ба Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон муҳтарам Шавкат Мирзиёев изҳори сипоси амиқ намуданд.

11.06.2021, шаҳри Хуҷанд
 

Субҳи 11 июн Президенти Ҷумҳурии Ӯзбекистон муҳтарам Шавкат Мирзиёев дар идомаи сафари расмии худ ба Ҷумҳурии Тоҷикистон ба шаҳри бостонии Хуҷанди вилояти Суғд ташриф оварданд.

Меҳмони олиқадрро Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, роҳбарият ва намояндагони аҳли ҷомеаи вилояти Суғд бо риояи анъанаю суннатҳои хоси ҳамсоягӣ, дӯстию рафоқат ва меҳру муҳаббат, гарму самимӣ истиқбол гирифтанд.

Иродаи сиёсии роҳбарони ҳар ду давлат Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон муҳтарам Шавкат Мирзиёев дар муносибатҳои байни Тоҷикистону Ӯзбекистон марҳилаи навро оғоз бахшид.

Соли 2018 гузаргоҳҳои сарҳадии байни Тоҷикистону Ӯзбекистон ифтитоҳ гардид. Мулоқотҳои дуҷониба ва гуфтушунидҳо, сафарҳои давлатии сарони ҳар ду давлат, имзои созишномаҳо дар бораи шарикии стратегӣ миёни кишварҳои дӯсту бародар ва таъмини рафтуомади озоди шаҳрвандон ба таҳкиму густариши ҳамкориҳои тиҷоратию иқтисодӣ, гуманитарӣ ва илмӣ-фарҳангии Тоҷикистону Ӯзбекистон замина гузоштааст.

Дар доираи созишномаҳои байнидавлатӣ робитаҳои минтақавии вилоятҳои ҳар ду кишвар дар соҳаҳои гуногун инкишоф меёбанд.

Дар назар аст, ки роҳбарони ҳар ду давлат Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон муҳтарам Шавкат Мирзиёев зимни сафар аз корхонаҳои саноатӣ, иншооти энергетикӣ, мавзеҳои таърихию фарҳангии вилояти Суғди Ҷумҳурии Тоҷикистон боздид ба амал меоранд ва бо намояндагони доираҳои саноатию тиҷоратӣ, соҳибкорӣ, аҳли илму фарҳангу зиёи вилоят мулоқоту суҳбатҳо анҷом медиҳанд.

10.06.2021, шаҳри Душанбе
 

Шоми рӯзи 10 июн Президенти Ҷумҳурии Тоҷикистон муҳтарам Эмомалӣ Раҳмон ба ифтихори Президенти Ҷумҳурии Ӯзбекистон муҳтарам Шавкат Мирзиёев, ки бо сафари расмӣ дар Тоҷикистон қарор доранд, дар бӯстонсарои шаҳрӣ зиёфати ғайрирасмӣ орост, ки бо фазои гарму самимиаш ба як маҳфили Шоми дӯстӣ табдил ёфт.

Меҳмонони олимақом аз меҳмоннавозии гарми тоҷикӣ, ки аз ҷониби Сарвари давлати Тоҷикистон муҳтарам Эмомалӣ Раҳмон зоҳир гардид, басо шоду мамнун шуданд.

Дар бӯстонсарои шаҳрӣ Президенти Ҷумҳурии Ӯзбекистон муҳтарам Шавкат Мирзиёев ҳамчунин ба дарахтони мевадиҳанда ва сояафкану ороишии боғчаи атрофи қароргоҳ, ки аксараш аз ҷониби худи Сарвари давлат Эмомалӣ Раҳмон шинонда шудааст, таваҷҷуҳи хос зоҳир намуданд.

10.06.2021, шаҳри Душанбе
 

Ҷаноби Олӣ, Президенти Ҷумҳурии Ӯзбекистон, бародари азиз, муҳтарам Шавкат Мирамонович Мирзиёев!
Дӯстони арҷманд ва меҳмонони гиромӣ!

Шодем, ки имрӯз бародар ва дӯсти азизи мо – Президенти Ҷумҳурии Ӯзбекистон Шавкат Миромонович Мирзиёев меҳмони олиқадри мо мебошанд.

Бо камоли хушҳолӣ аз номи мардум ва Ҳукумати Ҷумҳурии Тоҷикистон меҳмонони азизи ӯзбекистониро хушомадед мегӯям:

Ҷаноби Олийлари, Ӯзбекистон Республикасининг Президенти, Шавкат Миромонович Мирзиёев!

Тожикистонга хуш келибсиз!

Қадам ларин гизга ҳасанот!

Шавкат Миромоновичи арҷманд,
Дӯстони азиз,

Таърихи муносибатҳои халқҳои тоҷику ӯзбек решаҳои амиқ ва анъанаҳои пуршарафи ҳамсоягии нек, дастгирии тарафайн ва кӯмаки якдигарро дорад.

Дар давраи тӯлонии таърихӣ байни гузаштагони мо дар тамоми соҳаҳои ҳаёт ҳамбастагӣ ба амал омад.

Натиҷаи ин раванди таърихӣ қаробати рӯҳию равонӣ, дар зеҳни бисёре аз наслҳои мо амиқ реша давондани арзишҳои муштараки ахлоқӣ ва фарҳангӣ мебошад.

Таърих нишон медиҳад, ки зиндагии якҷоя дар фазои ягонаи фарҳангӣ ва тамаддун омили ба ҳам наздик шудани халқҳои мо шудааст.

Гузаштагони мо дар рушди илм, назм ва насри ҷаҳонӣ саҳми бузург гузоштаанд.

Онҳо шаҳрҳо ва иншооти меъмории хусусияти тамаддунидошта бунёд карданд.

Моро мероси бои маънавӣ ва фарҳангии дар тамоми ҷаҳон эътирофшуда муттаҳид месозад.

Мероси бойи халқҳои мо ба зиммаи мо — сиёсатмадорон, вазифа мегузорад, то муносибатҳоеро, ки ниёгонамон барқарор кардаанд, ҳифз ва афзун намоем, фазои дӯстию ризоиятро барои наслҳои оянда аз ҳар ҷиҳат, ба мисли Мавлоно Абдураҳмон Ҷомӣ ва Мир Алишер Навоӣ таҳким ва ғанӣ гардонем.

Асосгузори адабиётҳои муосири тоҷику ӯзбек устод Садриддин Айнӣ чунин гуфта буд: » Ҷомӣ ва Навоӣ дар муносибат ба мушкилоти асосии замони худ ҳамфикр буданд ва онҳоро бо дастгирии тарафайн ҳал мекарданд».

Дӯстони азиз,

Ба шарофати иродаи қавии сиёсӣ ва дастгирии халқҳои мо, Тоҷикистон ва Ӯзбекистон тавонистанд муносибатҳои дӯстӣ, ҳамсоягии нек ва ҳамкориҳои худро ба сатҳи сифатан нав бароранд.

Миёни кишварҳои мо сатҳи олии муносибатҳои байнидавлатӣ — шарикии стратегӣ ба роҳ монда шудааст.

Имрӯзҳо Тоҷикистон ва Ӯзбекистон собитқадамона пеш мераванд, муносибатҳои худро дар тамоми соҳаҳои ҳаёти ҷомеа бомаром рушд медиҳанд.

Дар як муддати кӯтоҳ мо на танҳо масъалаҳои ба назар ҳалнопазирро, ки дар тӯли солҳо ҷамъ шуда буданд, бартараф кардем, балки фазои эътимод ва ҳамкориро дар хонаи муштараки худ — Осиёи Марказӣ тақвият бахшидем.

Дар ин кор хидмати шахсии дӯст ва бародари азизи ман, муҳтарам Шавкат Миромонович Мирзиёев, ки барои таъмини пешрафти босифат дар муносибатҳои Тоҷикистону Ӯзбекистон тамоми шароити заруриро фароҳам овард, бузург мебошад.

Мутмаинам, ки сафари расмии имрӯзаи Президенти Ҷумҳурии Ӯзбекистон ба Тоҷикистон барои таҳкими минбаъда ва тавсеаи ҳамкориҳои мутақобилан судманд дар ҳама соҳаҳо такони тоза хоҳад бахшид.

Дӯстони азиз,

Соли гузашта ҷаҳон бо озмоиши бесобиқаи марбут ба паҳншавии коронавирус рӯ ба рӯ шуд.

Ба мушкилоти худ нигоҳ накарда, Ӯзбекистон бародарона ба мардуми мо кумак расонд.

Мардуми сипосгузори тоҷик, муҳтарам Шавкат Миромонович, кумак дар шакли лавозимоти тиббӣ, беморхонаи сайёр ва инчунин ба Тоҷикистон фиристодани як гурӯҳи вирусшиносони ботаҷрибаро фаромӯш нахоҳад кард.

Мехостам аз номи халқи тоҷик ва шахсан аз номи худам ба Шумо, бародари азизам, барои мусоидат ва кумакатон дар рафъи оқибатҳои пандемия миннатдории амиқ изҳор намоям.

Ҳамаи ин аз меҳрубонӣ ва саховати мардуми бародари ӯзбек ва хиради фарзанди фарзонаи он — Шавкат Миромонович шаҳодат медиҳад.

Дӯстони азиз,

Дар солҳои охир мо шоҳиди ислоҳотҳои азиме ҳастем, ки дар Ӯзбекистони бародар амалӣ мешаванд.

Онҳо дар ба даст овардани натиҷаҳои баланди рушд дар тамоми соҳаҳои ҳаёти кишвари ба мо дӯст мусоидат намуданд.

Мардуми Тоҷикистон аз дастовардҳои халқи бародари ӯзбек — ҳамсояи наздиктарини худ самимона шоданд.

Шавкат Миромоновичи азиз!

Ба шарофати саъю кӯшиши мову Шумо халқҳои кишварҳоямон имрӯз шаҳди аз меваҳои ширини муносибатҳои бародаронаро мечашанд.

Мо ба ояндаи муносибатҳои Тоҷикистону Ӯзбекистон бо итминон ва хушбинона назар дорем.

Ман ба халқи бародари ӯзбек муваффақиятҳои минбаъда, сулҳ ва шукуфоӣ таманно дорам.

Ва бо истифода аз фурсати муносиб, муҳтарам Шавкат Миромонович, бо хушнудии зиёд мехоҳам рисолати гувороеро иҷро намоям.

Саҳифа аз 8 то 12
 
http://www.zoofirma.ru/