31 - уми августи соли равон Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои иштирок дар вохӯрии сарони давлатҳои узви Созмони ҳамкории Шанхай (СҲШ) ба шаҳри Тянҷини Ҷумҳурии Мардумии Чин сафар карданд ва ин сафари корӣ аз 31 август то 3 сентябр идома ёфт. Зимни ин сафар Пешвои миллат муҳтарам Эмомалӣ Раҳмон дар нишастҳои сатҳи олии СҲШ ва СҲШ-плюс иштирок ва суханронӣ карда, дар ҳошияи он бо роҳбарони як қатор давлатҳо мулоқоту суҳбатҳои пурсамар анҷом доданд. Ҳамзамон дар чорабинии тантанавӣ бахшида ба 80-солагии пирӯзии мардуми Чин бар милитаризми Ҷопон ва анҷоми Ҷанги дуюми ҷаҳонии зиддифашистӣ иштирок намуданд.

31 - уми август Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Тянҷини Чин дар маросими истиқболи роҳбарони ҳайатҳои иштироккунанда дар чорабиниҳои ҳамоиши Созмони ҳамкории Шанхай иштирок намуданд.

1. уми сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Тянҷин дар ҷаласаи Созмони ҳамкории Шанхай иштирок ва суханронӣ намуданд. Сарвари давлати мо муҳтарам Эмомалӣ Раҳмон ба Роҳбари кишвари мизбони Чин муҳтарам Си Ҷинпин барои дар сатҳи баланд ташкил намудани ҳамоиш ва меҳмоннавозии самимӣ изҳори сипос намуданд. Роҳбари давлати мо муҳтарам Эмомалӣ Раҳмон нақши Созмони ҳамкории Шанхайро дар рушди ҳамкории кишварҳои аъзо назаррас арзёбӣ карда, густариши минбаъдаи муколамаи сиёсии боэътимодро дар роҳи расидан ба ҳадафҳои созанда зарур шумурданд.

        “Мо рушди ҳамкорӣ дар самтҳои афзалиятноки иқтисод, аз ҷумла нақлиёт ва транзит, энергетика, саноат, кишоварзӣ, инноватсия ва рақамисозиро муҳим мешуморем”, иброз доштанд Президенти кишвари мо муҳтарам Эмомалӣ Раҳмон. Сарвари давлати мо дар бораи тадбирҳои Ҳукумати Ҷумҳурии Тоҷикистон дар самти рушди инфрасохтори нақлиётӣ ва азхудкунии иқтидори гидроэнергетикии кишвар андешаронӣ намуданд. Имкониятҳои Тоҷикистон барои ҷалби сармоя ба рушди саноат, таъсиси корхонаҳои муосири коркарди захираҳои канданиҳои фоиданок ва бахши агросаноатӣ муаррифӣ карда шуд. Роҳбари давлат бо дарназардошти имкониятҳои муҳити табии Тоҷикистон, иштирокдорони ҳамоишро ба ҳамкории густурда дар соҳаи сайёҳӣ, бахусус сайёҳии экологӣ, куҳнавардӣ ва табобатӣ даъват намуданд.

        Зимни таҳлили вазъи таъмини амнияти минтақавӣ ҳамкории кишварҳои аъзои Созмон дар муборизаи муштарак бо терроризм, экстремизм, сепаратизм ва радикализм дар ҳама зуҳуроти он, инчунин бо таҳдидҳои киберӣ, гардиши ғайриқонунии маводи мухаддир, ва дигар намудҳои фаъолияти ҷинояткории фаромиллӣ зарур шумурда шуд.

        Таъкид гардид, ки созишномаҳо оид ба таъсиси Маркази зиддимухаддиротии Созмони ҳамкории Шанхай ва Маркази универсалии мубориза бо хатарҳо ва таҳдидҳои амнияти кишварҳои аъзои Созмони ҳамкории Шанхай, ки имрӯз ба имзо расид, дурнамои навро барои ҳамкории давлатҳо дар самтҳои зикршуда боз менамоянд.

         Гуфта шуд, ки бо мақсади густариши ҳамкории бисёрҷониба дар мубориза бо терроризм ва манбаъҳои маблағгузории он, бо ташаббуси Тоҷикистон ва дастгирии Созмони Милали Муттаҳид “Раванди Душанбе оид ба мубориза бо терроризм” фаъолона пеш бурда мешавад. Президенти кишвари мо муҳтарам Эмомалӣ Раҳмон бори дигар мавқеъи устувор ва тағйрнопазири Тоҷикистонро дар самти ҳалли вазъи мураккаб дар Шарқи Наздик ва дигар кишварҳои ҷангзада таъйид намуданд.

         Роҳбари давлат муҳтарам Эмомалӣ Раҳмон аз ташаббусҳои ҷаҳонии кишвари мо, аз ҷумла дар самти ҳалли мушкилоти марбут ба оби ошомиданӣ ва ҳифзи пиряхҳо ёдовар шуда, таъкид намуданд, ки “Тоҷикистон зиёда аз бист сол аст, ки масъалаҳои ҷаҳонии марбут ба захираҳои обӣ, иқлим ва рушди устуворро пеш мебарад, аз ҷумла майдонҳои байналмилалии “Раванди оби Душанбе” ва “Раванди Душанбе оид ба ҳифзи пиряхҳо”-ро рушд медиҳад.

        Пешбурди ташаббуси Тоҷикистон оид ба қабули қатъномаи махсуси Маҷмаи Умумии Созмони Милали Муттаҳид дар бораи эълони “Даҳсолаи таҳкими сулҳ ба хотири наслҳои оянда” идомаи тадбирҳои башардӯстонаи кишвари мо номида шуд.

        Президенти кишвар муҳтарам Эмомалӣ Раҳмон зарурати ҳамёрии зичи кишварҳои “Оилаи Созмони ҳамкории Шанхай”, Созмони Милали Муттаҳид, ташкилотҳои шарики минтақавӣ ва дигар ҷонибҳои манфиатдорро таъкид намуданд. Аз ҳамроҳ шудани Ҷумҳурии Халқӣ-Демократии Лаос ба сифати понздаҳумин шарики муколамаи Созмон истиқбол карда шуд. Дар анҷоми ҷаласа 15 санади нави ҳамкорӣ, аз ҷумла Созишнома оид ба таъсиси Маркази зиддимухаддиротии СҲШ дар шаҳри Душанбе ба имзо расид.

        Тавре дар  боло зикр кардем дар доираи ин сафари кори бо як қатор сарони давлатҳо мулоқоту суҳбатҳои пурсамар анҷом доданд. Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ҳошияи Ҳамоиши Созмони ҳамкории Шанхай рӯзи 1 - уми сентябр дар шаҳри Тянҷини Ҷумҳурии Мардумии Чин бо Сарвазири Ҷумҳурии Ҳиндустон Нарендра Моди суҳбати самимӣ анҷом доданд. Зимнан доир ба густариши робитаҳои сиёсӣ, тиҷоратию иқтисодӣ ва фарҳангию башарӣ табодули афкор сурат гирифт. Сарони ҳар ду давлат аз раванди рушди муносибатҳои гуногунҷанбаи Тоҷикистону Ҳиндустон изҳори қаноат намуданд. Ҳамзамон дар ин рӯз бо Президенти Федератсияи Русия Владимир Путин мулоқоти сатҳи баланд анҷом доданд. Зимни суҳбат ҷонибҳо масъалаҳои мубрами муносибатҳои дуҷонибаро баррасӣ карда, доир ба натиҷаҳои ҳамоиши Созмони ҳамкории Шанхай табодули афкор намуданд. Масъалаҳои алоҳидаи рӯзномаи байналмиллалӣ ва минтақавӣ низ мавриди таваҷҷуҳ қарор гирифт. Ҳамчунин масъалаҳои вобаста ба ҳамоишҳои дарпешистодаи сатҳи олӣ баррасӣ шуд.

        1 - уми сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Тянҷини Ҷумҳурии Мардумии Чин бо Раиси Ҷумҳурии Исломии Эрон Масъуди Пизишкиён мулоқот намуданд. Президенти кишвар муҳтарам Эмомалӣ Раҳмон дар оғози суҳбат аз тамоюли афзояндаи тамосу мулоқот дар сатҳҳои олӣ ва баланд изҳори қаноат намуданд. Ҷонибҳо ба густариши равобити иқтисодиву тиҷоратӣ, ҳамкорӣ дар соҳаҳои энергетика, ҳамлу нақли байналмилалӣ, илму фанновариҳо, кишоварзӣ, тандурустӣ ва дигар бахшҳои барои ҳарду ҷониб манфиатовар таваҷҷуҳи зиёд зоҳир намуданд. Аз лағви раводид миёни Тоҷикистону Эрон, ки дар пешбурди ҳамкорӣ дар соҳаҳои гардишгарӣ, тиҷорат, нақлиёт, фарҳанг ва тиб нақши назаррасе гузоштааст, истиқбол карда шуд. Атрофи вазъи кунунии мураккабу ноустувор ва пешгӯинашаванда дар Ховари Миёна табодули афкор сурат гирифт. Ба таҳкими ҳамкорӣ дар доираи ниҳодҳои байналмилалӣ ва минтақавӣ низ таваҷҷуҳи зиёд зоҳир гардид.

       Пешвои миллат муҳтарам Эмомалӣ Раҳмон дар ҳошияи ҷаласаи Шурои сарони давлатҳои аъзои Созмони ҳамкории Шанхай дар таърихи 1 - уми сентябр бо Президенти Бонки Осиёии Сармоягузориҳои Инфрасохторӣ  Ҷин Литсюн мулоқот намуданд. Президенти кишвари мо муҳтарам Эмомалӣ Раҳмон саҳми бонкро дар рушди инфрасохтори устувор ва таҳкими ҳампайвандии кишварҳои минтақа намоён номиданд. Таъкид гардид, ки Бонк дар татбиқи чор лоиҳаи сармоягузорӣ дар Тоҷикистон ба маблағи умумии беш аз 430 миллион доллар иштирок дорад, аз ҷумла дар сохтмони неругоҳи Роғун ва пули бузурги мошингарди дарозиаш 920 метр дар ноҳияи Нуробод. Дар ин зимн бонк тасмим гирифтааст, ки маблағгузории худро ба неругоҳи Роғун ба 500 миллион доллари амрикоӣ расонад. Ҷонибҳо имконоти васеъи ҳамкорӣ дар самти энергетикаи “сабз”, аз ҷумла сохтмон ва навсозии неругоҳҳои барқии гуногуниқтидор ва ба истифода додани дастгоҳҳои офтобию бодиро муҳокима намуданд. Дастгирии молиявии Бонк барои татбиқи лоиҳаҳо дар самти идоракунии захираҳои об, коҳиш додани хатари селу ярч ва ҷалби технологияҳои муосири назорату мониторинг зарур шумурда шуд. Ба тақвияти ҳамгироии нақлиётӣ, рушди инфрасохтори он ва навсозии низомҳои коммуналӣ низ таваҷҷуҳи зиёд зоҳир гардид.

       Ҳамчунин дар ин рӯз Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Тянҷин дар ҷаласаи “Созмони ҳамкории Шанхай-плюс” дар мавзуъи “Татбиқи бисёрҷониба, таъмини амнияти минтақавӣ ва мусоидат ба рушди устувор” иштирок ва суханронӣ намуданд.

Пешвои миллат муҳтарам Эмомалӣ Раҳмон бори дигар ба роҳбарияти кишвари мизбон барои ташкили сатҳи баланди чорабинӣ ва дар доираи созмон фароҳам овардани имкони хуби баррасии масоили ҳамкорӣ изҳори сипос намуданд.

       Пешвои миллат муҳтарам Эмомалӣ Раҳмон оид ба нақши Созмони ҳамкории Шанхай дар рушди ҳамкории гуногунҷанба андешаронӣ карда, таваҷҷуҳи роҳбарони кишварҳо ва намояндагони воломақоми созмонҳои иштирокдори ҳамоишро ба масъалаҳои мубрам ва ҳалли мушкилоти глобалӣ ҷалб намуданд.

        Ба таваҷҷуҳи иштирокдорони ҷаласаи Созмони ҳамкории Шанхай-плюс тадбирҳои то имрӯз анҷомдодаи Тоҷикистон дар соҳаҳои афзалиятноки нақлиёт, гидроэнергетика, саноат ва дигар самтҳо расонда шуд. Даъват карда шуд, ки бар зидди таҳдиду хатарҳои ҷаҳони муосир ҳамкории муштарак тақвият дода шавад. Роҳбари давлати мо муҳтарам Эмомалӣ Раҳмон, ҳамчунин, аз ташаббусҳои ҷаҳонии Тоҷикистон, аз ҷумла дар самти ҳалли мушкилоти вобаста ба оби ошомиданӣ ва ҳифзи пиряхҳо ёдовар шуда, ҳамаи кишварҳо ва созмону ниҳодҳои минтақию ҷаҳонии алоқамандро ба ҳамкории самарабахш даъват намуданд.

         Рӯзи 2 - юми сентябр  дар доираи сафари корӣ ба Ҷумҳурии Мардумии Чин бо Сарвазири Ҷумҳурии Исломии Покистон муҳтарам Шаҳбоз Шариф мулоқот намуданд. Зимни суҳбат ҳолати кунунӣ ва дурнамои ҳамкории миёни ду кишвар баррасӣ шуд. Президенти кишвари мо муҳтарам Эмомалӣ Раҳмон алоқамандии Тоҷикистонро ба рушду тавсеаи муносибатҳои гуногунҷанбаи Тоҷикистону Покистон таъкид намуданд.

         Муҳтарам Шаҳбоз Шариф дар навбати худ изҳор доштанд, ки “дӯстию бародарии мову шумо ва мардумони Покистону Тоҷикистон аз қалб бармехезад ва мо ба ин арҷи баланд мегузорем”. Масоили таҳкиму тавсеаи робитаҳои ду кишвар дар арсаи сиёсӣ, тиҷорату иқтисод, бахусус энергетика ва нақлиёт, фарҳанг, илму маориф, техника ва амнияту мудофиа муҳокима гардид. Рушди минбаъдаи ҳамкории байнипарлумонӣ зарур дониста шуд. Дар роҳи баррасӣ ва ҳалли маҷмуи масъалаҳои ҳамкории иқтисодию тиҷоратӣ, фарҳангиву гуманитарии ду кишвар нақши Комиссияи муштараки байниҳукуматӣ муҳим дониста шуд. Дар ин замина, ҷонибҳо хостори бештар фаъол гардидани дигар василаҳои пешбурди ҳамкорӣ, аз ҷумла Гурӯҳи кории нафту газ, энергетика ва Шурои муштараки соҳибкорон шуданд. Таъкид гардид, ки дар шароити кунунӣ барои ҳар ду ҷониб ҳамкорӣ дар соҳаи нақлиёт аҳамияти калидӣ дорад. Дар ин самт таъсиси Шурои муштараки ширкатҳои боркашонии ду кишвар иқдоми муассир шумурда шуд. Алоқамандии кишвари мо барои дастрасӣ ба долонҳои байналмилалии нақлиётӣ ва бандарҳои чаҳонӣ иброз гардид. Ҳамкорӣ дар соҳаи гидроэнергетика ва рушди бозори неруи барқ дар минтақа, аз ҷумла татбиқи саривақтии тарҳи КАСА-1000 муҳим арзёбӣ гардид. Зимни баррасии масоили ҳамкорӣ дар соҳаи амният мавзуи мубориза бо терроризми байналмилалӣ, ифротгароӣ, пешгирӣ аз гардиши ғайриқонунии маводи мухаддир ва дигар зуҳуроти ҷинояткории муташаккили фаромилӣ муҳокима шуд.

         2 - юми сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Пекин бо Раиси Ҷумҳурии Мардумии Чин муҳтарам Си Ҷинпин мулоқот намуданд. Дар вохӯрӣ маҷмуи масоили ҳамкории дуҷонибаву бисёрҷонибаи Тоҷикистону Чин, аз ҷумла робитаҳо дар чаҳорчӯби созмонҳои байналмилалию минтақавӣ, бо таваҷҷуҳи зиёд ба рӯзномаи Созмони ҳамкории Шанхай баррасӣ шуд. Президенти кишвари мо муҳтарам Эмомалӣ Раҳмон таъкид доштанд, ки “Мо саҳми шоистаи Шуморо, ҷаноби Си Ҷинпин, дар тавсеаи ҳамкории гуногунҷанбаи кишварҳоямон баланд арзёбӣ менамоем”.

        Таъкид гардид, ки бо вуҷуди шароити мураккаби геосиёсӣ Созмони ҳамкории Шанхай дар таъмини амну субот ва густариши робитаҳои судманди байнидавлатӣ саҳми худро мегузорад. Сарвари давлати мо бо таъкиди дастгирии ташаббуси нави “Идораи глобалӣ”-и Раиси Ҷумҳурии Мардумии Чин изҳор доштанд, ки ин ташаббус бо талошҳои пайвастаи ҷониби Тоҷикистон ҷиҳати таъмини волоияти қонун, сулҳи комил, амният ва рушди устувор ҳамсон аст ва барои пешбурди ҳадафҳои муштараки мо зарфияти зиёд дорад.

        Ҳамзамон ҷонибҳо аз такмили абзорҳои ҳамкорӣ дар қолаби “Осиёи Марказӣ-Чин” изҳори қаноатмандӣ намуданд. Ба масъалаҳои густариши минбаъдаи ҳамкорӣ дар ҳамаи арсаҳои ҷавобгӯи манфиатҳои мардумони ду кишвар, аз ҷумла иқтисодиву тиҷоратӣ, рақамикунонӣ, таҷдиду рушди инфрасохтори нақлиётӣ, логистика, истифодаи имкониятҳои транзитӣ, ҷалби сармоя ва технологияҳои Чин ба иқтисоди Тоҷикистон таваҷҷуҳи зиёд зоҳир гардид. Таъсиси марказҳои хизматрасонии иттилоотию технологӣ (Data center), таҳкими амнияти киберӣ, истифода аз зеҳни сунъӣ ва технологияҳои рақамӣ аз самтҳои дигари ҳамкории стратегӣ номида шуд.

Дар натиҷаи мулоқоти пурсамари сарони ду кишвар ҳашт санади нави ҳамкорӣ миёни ду кишвар ба имзо расид:

— Созишнома миёни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин дар бораи алоқаи байналмилалии автомобилӣ;

— Ёддошти тафоҳум миёни Вазорати корҳои хориҷии Ҷумҳурии Тоҷикистон ва Вазорати корҳои хориҷии Ҷумҳурии Мардумии Чин оид ба Ташаббуси амнияти глобалӣ;

— Ёддошти тафоҳум миёни Вазорати рушди иқтисод ва савдои Ҷумҳурии Тоҷикистон ва Агентӣ оид ба ҳамкории байналмилалии Ҷумҳурии Мардумии Чин оид ба ҳамкорӣ дар соҳаи рушди захираҳои инсонӣ;

— Ёддошти тафоҳум миёни Вазорати саноат ва технологияҳои нави Ҷумҳурии Тоҷикистон ва Вазорати захираҳои табиии Ҷумҳурии Мардумии Чин оид ба ҳамкорӣ дар соҳаи саноати кӯҳкорӣ ва технологияҳои нав;

— Ёддошти тафоҳум дар бораи таҳкими ҳамкорӣ дар соҳаи иқтисодиёти рақамӣ миёни Агентии инноватсия ва технологияҳои рақамии назди Президенти Ҷумҳурии Тоҷикистон ва Идораи миллии иттилооти Ҷумҳурии Мардумии Чин;

— Ёддошти тафоҳум оид ба ҳамкорӣ дар соҳаи рушди сабз ва камкарбон миёни Кумитаи ҳифзи муҳити зисти назди Ҳукумати Ҷумҳурии Тоҷикистон ва Кумитаи давлатӣ оид ба рушд ва ислоҳоти Ҷумҳурии Мардумии Чин;

— Ёддошти тафоҳум оид ба ҳамкории оморӣ  миёни Агентии омори назди Президенти Ҷумҳурии Тоҷикистон ва Бюрои миллии омори Ҷумҳурии Мардумии Чин;

— Ёддошти тафоҳуми ҳамкорӣ миёни Консерваторияи миллии Тоҷикистон ба номи Талабхуҷа Сатторов ва Консерваторияи Тянҷини Ҷумҳурии Мардумии Чин.

         Рӯзи 3-юми сентябр дар шаҳри Пекин Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Раиси Кумитаи доимии Маҷлиси умумичинии намояндагони мардумии Ҷумҳурии Мардумии Чин Чжао Лэтсзи мулоқот карда, маҷмуи масоили ҳамкории ду кишварро баррасӣ намуданд.

        Дар оғоз Сарвари давлати мо роҳбарият ва мардуми Чинро бо солгарди 80-уми пирӯзии мардуми Чин бар милитаризми Ҷопон ва анҷоми ҷанги дуюми ҷаҳонии зиддифашистӣ ва баргузорсозии бомуваффақияти чорабиниҳои пуршукуҳ ба ин муносибат табрику таҳният гуфтанд.

        Роҳбари Парлумони Чин зимни баҳогузорӣ ба сатҳ ва муҳтавои муносибатҳои дуҷониба бо кишвари мо, аз ҷумла изҳор дошт: “Чин ҳамеша дӯсти аз ҳама боэътимод ва шарики боварибахши Тоҷикистон хоҳад буд”.

        Президенти кишвар муҳтарам Эмомалӣ Раҳмон аз сатҳу мундариҷаи робитаҳои ҳамкорӣ бо Ҷумҳурии Мардумии Чин изҳори қаноатмандӣ намуда, иброз доштанд, ки Чин барои Тоҷикистон дӯсти боэътимод, ҳамсояи нек ва шарики ҳамаҷонибаи стратегӣ мебошад. Ҷонибҳо муколамаи пайвастаи сиёсӣ, инчунин ҳамкорӣ дар соҳаҳои иқтисодиву тиҷоратӣ ва фарҳангиву гуманитариро муҳокима намуданд.

         Ҳамчунин  Пешвои миллат муҳтарам Эмомалӣ Раҳмон дар шаҳри Пекин ҳамроҳ бо Раиси Ҷумҳурии Мардумии Чин муҳтарам Си Ҷинпин ва дигар роҳбарони давлатҳо дар майдони Тянанмэн дар чорабинии тантанавӣ бахшида ба 80-солагии пирӯзии мардуми Чин бар милитаризми Ҷопон ва анҷоми ҷанги дуюми ҷаҳонии зиддифашистӣ иштирок намуданд. Бояд ёдовар шуд, ки ин чорабинии тантанавӣ бо иштироки сарони давлатҳо ва ҳукуматҳои 26 кишвари дунё баргузор гардид.   

         Сафари кории Пешвои миллат муҳтарам Эмомалӣ Раҳмон ба Тянҷин барои ширкат дар нишасти 25-уми Созмони ҳамкории Шанхай яке аз марҳилаҳои муҳим дар сиёсати хориҷии Ҷумҳурии Тоҷикистон маҳсуб меёбад. Дар ин чорабинии сатҳи баланд, Пешвои миллат дар муҳокимаи масъалаҳои муҳими амниятӣ, иқтисодӣ ва ҳамкориҳои минтақавӣ фаъолона иштирок намуда, мавқеи устувори Тоҷикистонро дар доираи Созмони ҳамкории Шанхай баён дошт.

Ҳузури фаъоли Эмомалӣ Раҳмон дар нишаст на танҳо ба таҳкими муносибатҳои дуҷониба бо кишварҳои аъзои СҲШ мусоидат намуд, балки имконият фароҳам овард, то Тоҷикистон саҳми муассири худро дар ҳалли масъалаҳои стратегии минтақа ва ҷаҳон пешниҳод намояд. Ин сафар боз як намунаи равшани нақши афзояндаи Тоҷикистон дар муносибатҳои байналмилалӣ ва сиёсати фаъоли хориҷии кишвар ба шумор меравад.

ШАРИФОВ Искандар

ходими илмии шуъбаи ШМА ва Канадаи

Институти омузиши масъалахои давлатхои

ва Аврупои АМИТ

Адабиёт истифодашуда

1.   Президенти Ҷумҳурии Тоҷикистон Эмомалӣ Раҳмон бо Сарвазири Ҷумҳурии Ҳиндустон Нарендра Моди суҳбат анҷом доданд. https://khovar.tj/2025/09/prezidenti-um-urii-to-ikiston-emomal-ra-mon-bo-sarvaziri-um-urii-induston-narendra-modi-su-bat-an-om-dodand/

2. Президенти Ҷумҳурии Тоҷикистон Эмомалӣ Раҳмон дар маросими истиқболи роҳбарони ҳайатҳои иштироккунанда дар чорабиниҳои ҳамоиши Созмони ҳамкории Шанхай иштирок намуданд. https://khovar.tj/2025/08/prezidenti-um-urii-to-ikiston-emomal-ra-mon-dar-marosimi-isti-boli-ro-baroni-ajat-oi-ishtirokkunanda-dar-chorabini-oi-amoishi-sozmoni-amkorii-shanhaj-1-namudandg/

3. Президенти Ҷумҳурии Тоҷикистон Эмомалӣ Раҳмон бо Президенти Бонки Осиёии Сармоягузориҳои Инфрасохторӣ (БОСИ) Ҷин Литсюн мулоқот намуданд. https://khovar.tj/2025/09/prezidenti-um-urii-to-ikiston-emomal-ra-mon-bo-prezidenti-bonki-osiyoii-sarmoyaguzori-oi-infrasohtor-bosi-in-litsyun-mulo-ot-namudand/

4. Сарвари давлат Эмомалӣ Раҳмон дар ҷаласаи «СҲШ-плюс» дар мавзуи «Татбиқи бисёрҷониба, таъмини амнияти минтақавӣ ва мусоидат ба рушди устувор» иштирок намуданд. https://khovar.tj/2025/09/sarvari-davlat-emomal-1ra-mon-dar-alasai-s-sh-plyus-dar-mavzui-tatbi-i-bisyor-oniba-tamini-amniyati-minta-av-va-musoidat-ba-rushdi-ustuvor-ishtirok-namudand/

5. Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Владимир Путин мулоқот намуданд. https://khovar.tj/2025/09/prezidenti-um-urii-to-ikist1on-emomal-ra-mon-bo-prezidenti-federatsiyai-rusiya-vladimir-putin-mulo-ot-namudand-6/

6. Президенти Ҷумҳурии Тоҷикистон Эмомалӣ Раҳмон бо Раиси Ҷумҳурии Исломии Эрон Масъуди Пизишкиён мулоқот намуданд. https://khovar.tj/2025/09/prezidenti-um-urii-to-ikiston-emomal-ra-mon-bo-raisi-um-urii-islomii-eron-masudi-pizishkiyon-mulo-ot-namudand/

7. Президенти Ҷумҳурии Тоҷикистон Эмомалӣ Раҳмон бо Сарвазири Ҷумҳурии Исломии Покистон Шаҳбоз Шариф мулоқот намуданд. https://khovar.tj/2025/09/prezidenti-um-urii-to-ikiston-emomal-ra-mon-bo-sarvaziri-um-urii-islomii-pokiston-mu-taram-sha-boz-sharif-mulo-ot-namudand/

8. Президенти Ҷумҳурии Тоҷикистон Эмомалӣ Раҳмон бо Раиси Ҷумҳурии Мардумии Чин Си Ҷинпин мулоқот намуданд. https://khovar.tj/2025/09/prezidenti-um-urii-to-ikiston-emomal-ra-mon-bo-raisi-um-urii-mardumii-chin-si-inpin-mulo-ot-namudand-5/

9. Президенти Ҷумҳурии Тоҷикистон Эмомалӣ Раҳмон дар чорабинии тантанавӣ дар Пекин иштирок намуданд. https://khovar.tj/2025/09/prezidenti-um-urii-to-ikiston-emomal-ra-mon-dar-chorabinii-tantanav-ishtirok-namudand/

10. Сарвари давлат Эмомалӣ Раҳмон бо Раиси Кумитаи доимии Маҷлиси умумичинии намояндагони мардумии Чин Чжао Лэтсзи мулоқот намуданд. https://khovar.tj/2025/09/sarvari-davlat-emomal-ra-mon-bo-raisi-kumitai-doimii-ma-lisi-umumichinii-namoyandagoni-mardumii-chin-chzhao-letszi-mulo-ot-namudand/

11. Президенти Ҷумҳурии Тоҷикистон Эмомалӣ Раҳмон дар ҷаласаи Созмони ҳамкории Шанхай иштирок намуданд. https://khovar.tj/2025/09/prezidenti-um-urii-to-ikiston-emomal-ra-mon-dar-alasai-sozmoni-amkorii-shanhaj-ishtirok-namudand/